B. Atarikoen Batzar Nagusiaren akta

OHIKO BATZAR NAGUSIA

AKTA

A. Deialdia
------------------------------------

Nork deitua: presidenteak

Eguna: maiatzaren 14a, asteazkena

Ordua: 19:30 (1. deialdia)

Lekua: Iparragirre kalea 18ko ataria

B. Gai zerrenda
------------------------------------

Diru kontuen berri ematea.
Euskaltel instalatzeko proposamen berria.
Kuotak kobratzea.
Patioko hezetasunak eta terrazetako isurbideen arazoak.
Hobi septikoa.
Markesina garbitzea.
Norberak lekarkeena.

C. Etorritakoak
------------------------------------

Lokala Ordezkaria

1b Mikel Ugarteburu (4,90 partaidetza kuota)

2c Luis Gonzalez (8,8 partaidetza kuota)

3a Kontxi Ibarra (4,90 partaidetza kuota)

4b Juan Carlos Perez (4,90 partaidetza kuota)

5b Felix Agirre (8,8 partaidetza kuota)

6c Santiago Etaio (4,90 partaidetza kuota)

D. Ordezkatuta
------------------------------------

Lokala Ordezkaria

Harategia Mertxe Lujanbioren ordez Kepa Garaita etorri da (14,65 partaidetza kuota)

1. Diru kontuen berri ematea

Administratzaileak administrazioa hartu duenetik orain arte izandako sarrera eta gastuen zerrenda banatu du (ikusi eranskina).

2. Euskaltel instalatzeko proposamen berria

Euskaltelek proposamen berri bat ekarri du instalazioa egiteko. Kablea ataritik pasatu beharrean fatxadetatik joango litzateke, ondoko atarietan egin duten moduan. Patioko fatxadatik igo, gero teilatutik eta Jon Arrospidenetik jaitsiko litzateke. Aho batez onartu da.

3. Kuotak kobratzea

Banestok bi aldiz kobratu dizkie martxoko kuotak kontua banku honetan ez daukatenei. Ondoren agindua eman zuen konpontzeko, baina banku ba-tzuek ez dute konpondu. Beraz, oraindik dirua itzuli gabe baduzue, eman ordainagiria administratzaileari, hark bankura eraman eta itzulketa egin dezaten zuzenean.

4. Patioko hezetasunak eta terrazetako isurbideen arazoak

Bi aurrekontu eskatu dira: 600 eurokoa bat eta 300koa bestea. Horrez gain, 1A eta 1B terrazetan isurbide edo kainu-zuloak aldatzeko beste 300 euroko gastua legoke. Santiagok aipatu du orain dela 3 urte konpondu zirela eta bermea eduki behar dutela. Konpondu baino lehen aztertu gaia.

5. Hobi septikoa

Azaroan kendu zen, baina urez beteta dago une honetan. Gainera, lubakia egitean, burdina guztiak moztu zirenez, zorua beherantz joan da apur bat. Enpresari ez zaio guztiz ordaindu eta 6 hilabete barru zementuzko zoru berria botatzeko eskatu zaio. Aurrekontua begiratzeko eskatu da, Iris enpresak putzua bete behar zuen ala ez jakiteko. Putzua harriz betetzea ala oraingo ur filtrazioa kentzeko ponpa bat jartzea komeni den aztertzekotan geratu gara.

6. Markesina garbitzea

Enpresak 50 euroko aurrekontua pasatu du markesina garbitzeko. Aho batez onartu da garbiketa bi hilean behin egitea.

7. Norberak lekarkeena

Garbiketa.
Auzoko batzuek garbiketaren kalitateaz galdetu dute, xaboi eta lixiba usainik ez delako nabaritzen garbitzen duenean eta felpudoak ez direlako astintzen eta goiko solairuak ez direlako ondo garbitzen. Enpresara deitzekotan eta kalitate handiagoa exijitzekotan geratu gara.
Ataria konpontzea.
Urtero atarian hobekuntzaren bat egitea aipatu da: loreak, alfonbra aldatu, ate nagusia eta abar. Datorren bilerarako proposamenak aztertu eta aurrekontuak ekartzekotan geratu gara.

Antzuolan, 2004ko maiatzaren 30ean

Presidentea...............Idazkaria

Adibidea .rtf formatuan